fbpx

Parkinsonsamtökin og KSÍ í samstarf

 

 

 

 

 

 

Parkinsonsamtökin undirbúa fjáröflun fyrir Parkinsonsetur – KSÍ leggur verkefninu lið með þátttöku í árveknisátaki

Alþjóðlegi parkinsondagurinn er 11. apríl ár hvert. Það er með mikilli gleði sem við tilkynnum á þessum sérstaka degi að KSÍ hefur ákveðið að ganga til samstarfs við Parkinsonsamtökin um samfélagslegt verkefni. Við erum þessa dagana að vinna að undirbúningi fjáröflunar fyrir sérstakt Parkinsonsetur og mun KSÍ leggja því þarfa verkefni lið með því að taka virkan og öflugan þátt í árveknisátaki um verkefnið og parkinsonsjúkdóminn. Nánari upplýsingar um verkefnið og þátt KSÍ verða kynntar síðar.

Í stefnu KSÍ varðandi samfélagsleg verkefni segir m.a. KSÍ hafi ákveðið að velja tiltekin samfélagsleg verkefni á hverju ári og einbeita sér að þeim. „Gerður er samningur við tiltekna aðila um afmörkuð verkefni. Með þessari stefnumörkun er KSÍ að einbeita sér að tilteknum verkefnum í tiltekinn tíma, og leggja kraft í þau til að þátttakan vegi sem þyngst og geri viðkomandi verkefni og samfélaginu raunverulegt og áþreifanlegt gagn“. Samstarfið við Parkinsonsamtökin er í samræmi við þessa stefnumörkun.

Vilborg Jónsdóttir, formaður Parkinsonsamtakanna: „Við hjá Parkinsonsamtökunum erum gríðarlega ánægð með þetta samstarf. Þetta er stórt verkefni sem á eftir að skipta Parkinsonsamtökin miklu máli og við hlökkum mikið til samstarfsins með KSÍ“

Stefna KSÍ varðandi samfélagsleg verkefni